Cerita Rakyat :Manu Bakka Marowwe

Manu’ Bakka Marowē’
Riolo ri wanuanna Watangponē engka sēddi tau ri tella Larowē’ Monroē ri Tanana Bukaka . Padai tau laingngē majjama pallaung - pallaung kampongmi, maggalung, mattungka olo’kolo’mi bawang namaddare’ mappakumiro jamang jamangna to rikampongē riolo naikiya to pabbirinngē engka to massappa dallē mattasi’.
Engka sēddi wettu, tau ri tellaē La Rowē’ lao mabbaja rellē ri seddi galung ritellaē Lapatong, iyyaē galungngē riolo naporiolo ri isseng makarame’ to rikampongngē lettu’ makkokoangē narēkko engka tau talliwa bongana na iyyarēga si makkkamparang na takkabboro’ rionrongē ro maderi tama-tamakeng iyarēga malasa rēkko lettui ri bolana. Ri wettu lettuna namaēlo nabajai rellēna napalēnne’ lipa’na ri wiringna pētawuē na riwettu laona lisu engka sēddi tello ritengngana lipa’na na tenna isseng apolengenna nainappa makkeda ri lalengati naullē engka olo’kolo’ leppang makkitello ri lipa’ku riwettukku mabbaja rellē, na dēnasiaga ittana nalisu ri bolana mattiwi tello iyaē dē namasaro naisseng apolengenna, pattujunna iyyaro telloē maēloi na sēwong nainappa napasibau’ nanrē naikiya nataroi dolo tellona ri pabbaressengē nasaba talliwa tekkona polē mabbaja rellē.
Siangngesso labe’ē La Rowē’ dēnaingngerangngi tello nataroē ri pabbaresengē gangkanna pulo wenni na napaleccē ri sēddēna dapurengngē napaddi kandu’- kandu’ na dēsi nangngerangngi. Mangingngini La Rowē’ na taro sisengngi ri attapangē ri lalengna luwaē pattujunna narēkko malupui maēloni nasewong dē nasiaga ittana iyyaro telloē Monroē ri attapangngē maddeppa cia’- cia’ ri attapangē mancaji ana’ manu’ na purana na iyyaro La Rowē natunggka sisengni iyyaro manu’ē gangkanna malloppo mancaji manu’ bangko’ nasaba iyyaē manu’ē magello pakkalēngna na coba cobani La Rowē sawungngi na iyya manu’ē narēkko ri sawungngi pakala tuttu, taccicengmi bawang napitto’ balinna matteru matē dē napada manu’ laingnge tajjinnapa nainappa nullē mpauno manu’ē.
Dēna siaga ittana naengkalingani Arung Mangkau’ē engka manu malessi sawung laoni naēllau iyyaro manu’ē, nasaba iyyaro manu’ē maloppo pakkalēngna na tau tungkaēngngi ri tella La Rowē’ ritellani iyyaro manu’ē manu Bakka Marowē’. Riolo narēkko Arungngē maēlo punnai gagatta namuni iyyaro gagaē liwa ri pujinna tette’ ri abbariang nasaba Arungngē liwa’ segge’na nainappa pura mancaji ade’ toni, tau samaē nawajiki pakkasennangi Arung Mangkau’na. Ri wettu napunnaina Mangkau ē iyyaro manu’ē mancaji manu’ pasawungni nasaba Arung Mangkau’ē napuji mappasawung manu’, nasaba natemmaka lessinna iyyaro manu’ē taccicengmi bawang napitto balingna na matē’. maēgani curita momppo ri tenngana tau tebbe’ē makkeda iyyaro Manu’ Bakka Marowē’ ula indo’na, nasaba dē napada manu’ laingnge gangkanna sēddi wanua watangponē degaga mullē pacaui iyyaro manu’ē na ritiwini ri wanua Butung malliweng tasi’ massawung ; Naikkiya ri wettu na purana na kala manengngi manu pasawungngē ri Butung ripalisuni iyyaro manu’ Bakka Marowē riakkiringang labe lopi-lopi bura’ gangkanna rappē ri wanua Panyula riwettu lettuna ri Panyula macawē ri lompo’na tauwē riolo, mangngongngoi iyyaro manu’ē, naengkalingani tau Panyulaē makkeda engka sedding manu’ mangngongngo kaleki’ lokkako sē mu itai macawē polē rompongngē na engkana sēddi tau lao mitai iyyaro manu’ē nainappa makkeda “wa uwwaē Manu Bakka Marowe manengka koro “ tappa nassikongkoloki tau Panyulaē makkeda gēre bawangni dēto gaga mitai puranana natikkeng iyyaro manu’e nagereni tau Panyulaē nainappa nanasu likku nainappa manre massamang samang naikiya nabbiyangngi ajēna, naikiya iyyaro ajēna naittēi asunna Arung Mangkau’ē natiwi ri bolana Arung Mangkau’ē nainappa nappongang mabokka, makkutanani Arungngē makkeda “ magawi asuē nabbokka tuttu, itawi sē kaleki’ temmabboka bawangtu”. Napuranana iyyaro noni surona Arungngē mitai asuē nainappa makkeda ajē manu’ nabbokkai puang namettēni Arung Mangkau’ē makkeda “temmabbokka bawattu pēnresē mai witai ajē manu’ē naparēssana Arung Mangkau’ē ajē manu’ē nainappa makkeda ajēna ta’ manu’ Bakka Marowē’ē awwa iga pura manrewi accēri sē asuē igaro manrēi kamppa tunnaseng lo lokka nala ajēna cēddi, na naccērinna iyyaro asuē lettu ri tanana Panyula nainappa lao mappisengangngi ri Arungngē makkeda tau Panyula’ē gērei, ¯ iyyatonaro nassabari na ripoppangi tana tau Panyulaē, iyyatona nassabari ēngka warēkkada makkedaē ” na muni mallippa karoro tau Bukakaē mallipa’ ulaweng tau Panyulaē tangkei tau Bukakaē”. Iyyatonaro nassabari lettu makkokoangngē iyyaē missengengngi narēkko tau Panyula toto majarang maēlo tangke’i.